Inherent Chakaness

Jade Castro, pahiram muna ng term ha. Sabi mo naman pwede namin gamitin basta magpapaalam lang diba? Eto kasi ang nakikita kong problema: gusto natin nito. Gustong-gusto nating makanood ng mga bagay-bagay na hindi naman matino ang pagkakagawa. ‘Wag muna tayo pumunta sa pelikula dahil sa totoo lang, mas malaki ang problema ng telebisyon.

Sa tanghali, may manyak na nagpapaiyak ng mga pobreng matatanda atsaka bibigyan sila ng pera. Pinapalibutan rin niya ang sarili ng mga magagandang mga babae na binabastos nya kapag tinatawag ng kanyang laman.

Sa hapon, tila walang maipasok kaya’t mga dramang hinugot sa pwet ang ipinalalabas. Mas maganda na lang na manood ka ng home tv shopping.

Telenovela pa rin ang binabandila ng mga bumibidang estasyon. Maganda ang produksyon nito kaya siguro ito lamang ang palabas na matino ang hitsura. Pero hindi naman pwedeng ito lang ang pinapanood natin diba? Dito namamayagpag ang inherent chakaness. Kung may beauty contest, nasa kanya na ang korona.

Sa gabi, hindi mo na maihiwalay ang balita sa “primetime shockers”. Gusto nilang isinisigaw sa atin ang mga pangyayari. Gustong-gusto rin nilang ikwento ang mga pangyayari na walang kaisip-isip kung ano ang epekto sa atin nito. Kung may barilan sa Midsayap, siguro naman pwedeng maiksplika sa madla ang dahilan at epekto nito sa mga nakatira doon, at hindi lamang kung gaano karami ang nabaril at ilang galon ng dugo ang dumanak.

Hindi ko na alam kung paano gagawa ng show na walang inherent chakaness na itataya ng mga maykayang magtaya. Sa palagay ko kaya na naman ng mga manonood ng ilan-ilang mga palabas na walang inherent chakaness. Pero, hindi ako marunong kasi. Hindi pa yata kaya ng powers ko.